നിശ്ശബ്ദമീ പുലർകാലം
സുഖദമീ കുളിർ കാറ്റും
വിശുദ്ധമാം ഇളം തെന്നൽ
വിരിക്കുന്നു മലർ ജാലം
അരുമയായ് തലോടുന്നു
സാന്ത്വന പുലർവെയിൽ
ഒരുക്കുന്നു മനക്കാമ്പിൽ
ആശതൻ കിരണങ്ങൾ..
പിടയുന്നു മമചിത്തം
വരുംകാലദിനമോർക്കെ
വിടരുമോ പുലരികൾ
സുഖദമാം വാർത്തയുമായ്..
കൊറോണയെന്നൊരു പേരു
ദിനങ്ങൾക്കിന്നു ശാപമായ്
വിറങ്ങലിക്കുന്നതിൻ നടനം
കാതോർത്തങ്ങിരിക്കവേ..
വരുംകാലമോർത്തീടവേ
അകക്കാമ്പിലൊരു ഭീതി
ഉണർത്തുന്നു ഭയാനകം
നാടിതിൻ ഗതിയെന്തോ..
അടുത്തു നാമൊരുമിച്ച
വസന്തങ്ങൾ അകന്നുവോ
തലോടും കരങ്ങൾ തൻ
സാന്ത്വനമൊഴിഞ്ഞുവോ
നനുത്തൊരു വേദനയായ്
ബന്ധങ്ങൾ ചിതറിയോ
മനുവർഗ്ഗവിനാശമാം
നാളതിങ്ങടുത്തുവോ..
കൈവിടരുതുൾക്കരുത്ത്
മമ ചിത്തം മൊഴിയുന്നു.
ഇരുന്നിടാം ശുഭാപ്തി തൻ
തവ കൂരയിതിൻ കീഴെ..
ജപിച്ചിടാം മനസ്സൊന്നായ്
നാടിതിൻ രക്ഷയ്ക്കായി..
പതറരുതൊരു നാളും
ഫലമെന്തെന്നോർത്തിടേണ്ട
പൊരുതിടാം ഒന്നായിന്ന്
നമുക്കാവും വിധത്തിലായ്
അറിയില്ലയിതിന്നന്ത്യം
സുഖദമായ് ഭവിക്കട്ടെ...
peoms
SHARE THIS ARTICLE
copyrights © 2019 Gosree TV All rights reserved.