തിരുവനന്തപുരം: കേരള പോലീസിനെതിരായ വിവാദ പരാമർശത്തിൽ സിപിഐ ദേശീയ നേതാവ് ആനി രാജയെ പിന്തുണച്ച സിപിഐ ജനറൽ സെക്രട്ടറി ഡി. രാജയെ രൂക്ഷമായി വിമർശിച്ച് സിപിഐ സംസ്ഥാന സെക്രട്ടറി കാനം രാജേന്ദ്രൻ.
ദേശീയ സെക്രട്ടറിയായാലും ചെയർമാനായാലും പാർട്ടി മാനദണ്ഡങ്ങൾ ലംഘിക്കരുതെന്നും കാനം രാജേന്ദ്രൻ പത്രസമ്മേളനത്തിൽ പറഞ്ഞു. ആനി രാജയുടെ പ്രസ്താവനയെ അനുകൂലിച്ച് ഡി. രാജ നടത്തിയ പ്രതികരണം ദേശീയ എക്സിക്യൂട്ടീവിന്റെ തീരുമാനമല്ല. ആനി രാജയുടെ പ്രസ്താവന ദേശീയ എക്സിക്യുട്ടീവ് തള്ളിയതാണ്. പാർട്ടി മാനദണ്ഡം ലംഘിച്ചാൽ ആരായാലും വിമർശിക്കപ്പെടും.
സംസ്ഥാനത്തെ കാര്യം പറയുന്പോൾ സംസ്ഥാന ഘടകത്തോട് അഭിപ്രായം തേടണം. ഇതാണ് നിലവിലുള്ള മാനദണ്ഡം. അത് ലംഘിക്കപ്പെട്ടു. യുപിയിലെ പോലീസല്ല കേരളത്തിലുള്ളത്. ഡി. രാജയ്ക്ക് അതിനെക്കുറിച്ച് അറിയില്ല. പാർട്ടി മാനദണ്ഡങ്ങൾ ലംഘിച്ചാൽ ജനറൽ സെക്രട്ടറിയാണെങ്കിലും വിമർശിക്കും. പാർട്ടി ചെയർമാനായിരുന്ന എസ്.എ ഡാങ്കേയെ വിമർശിച്ച പാർട്ടിയാണ് സിപിഐ എന്നും കാനം കൂട്ടിച്ചേർത്തു.
kerala
SHARE THIS ARTICLE