All Categories

Uploaded at 3 months ago | Date: 13/10/2022 10:40:20

കവിത

ഒരുജന്മംകൂടി
         *       
(  ജയനാരായണൻ തൃക്കാക്കര)

മഴയുടെപാട്ടിൽ, താരാട്ടിൽ
മണ്ണിൻമാറിലുറങ്ങാനും
കുഞ്ഞോളങ്ങൾ കുസൃതികൾകാട്ടും
പുഴയുടെ പടവിലിരിക്കാനും

രാക്കിളിപാടും വനവീഥികളിൽ
രാത്രിയിലൊന്നുനടക്കാനും
താഴ് വാരത്തിൽ തനിയെയിരുന്നെൻ
തംബുരുമീട്ടിപ്പാടാനും

കൂടെനടക്കും കുഞ്ഞിക്കാറ്റിൻ
കാതിൽ കാരിയമോതാനും
കുന്നിലെ നല്ലൊരു മുത്തശ്ശീടെ
കുട്ടിക്കവിതകൾ കേൾക്കാനും

അരയാലിലകൾ നാമംചൊല്ലും
അമ്പലനടയിലിരിക്കാനും
മാനസവീണമുറുക്കീട്ടെന്നുടെ-
യീശനെവാഴ്ത്തിപ്പാടാനും

മൺചെരാതുകൾ മിഴിപൂട്ടുമ്പോൾ
മാടംപൂകി മയങ്ങാനും
വെറുതേപറയുകയല്ലീമണ്ണിൽ
വേണമെനിക്കിനിയൊരുജന്മം!

peoms

SHARE THIS ARTICLE

advertisment .....

 

copyrights © 2019 Gosree TV   All rights reserved.